..... ..........
.
لا صار خلّـك مستحـق المسبّـة
سبّه ترى العشاق غيـرك يسبّـون
لا آبوه لا آبو الحب من قلب سبّـه
لا آبو الغرام اللي يحدّك على الهون
يا لعن أبـو قلـب غشيـم يحبّـه
ملعون والقلب اللي يغليـه ملعـون
أقول مـن هبّـاك يـا خبـل هبّـه
الدون ما يسلك معاهم سوى الدون
عـزّ الجفـا ولا هـوان المحـبـة
مآخوذ من يصبر على الذل مغبـون
أظهر قواة البأس والضعـف خبّـه
ترى الضعيف ضعيف لا طعم لا لون
الرأس ما أحد يقطعـه غيـر ربّـه
أقول عزّ النفس ما أقول لك هـون
خلّـه يولّـي لا يـذلّـك بحـبّـه
بعد وتلقاهم علـى البعـد يدنـون
وإلا أنت لو ترقـد وبالعيـن شبّـة
أبرك من اللي يجرحونك ويسلـون
يا جاهل إفهم خذ مـن العلـم لبّـة
إصبر وتنسى والعـذارى ينسّـون
الرجـل عقلـه دائمـاً قبـل قلبـه
ماهو عمى بالقلب ومفتّـح عيـون
لا قدّمـوا حبّـة تقدمـت حـبّـة
وإن وخّروا وخرت والعز مضمـون
ترى غـلا هالوقـت هبّـة وهبّـة
إغنم هبوب الريح لا تقلب سكـون
لا ساعـدك حظّـك تغانـم مهبّـه
لا ترتهي يجيـك يـوم ويصـدّون
قبـل يذبّـك نـاب الأرداف ذبّــه
ترى حلاة الرجل طاعن ومطعـون
كم عاشق خلّوه مـن غيـر سبّـه
يصفق بكف كف ما يدري وشلـون
ما له جدى يـا كـود دمـع يكبّـه
عليه سيف الهجر والصد مسنـون
هذا مـن أول يـوم لـو دلّ دربـه
ما دشّ في دنيا المجانين مجنـون
لكن تبع قلبـه وقلبـه لعـب بـه
واليوم يبغى عون ما حصّل العـون
روّض فؤادك يا إبن الأجـواد ربّـه
البيض ما يصلح لهن كود فرعـون
وإلا ضعيف النفـس دايـم مسبّـة
ودّك مساكين البشـر مـا يحبّـون
.
